لسة فيكى رجالة يا مصر
بسم الله الرحمن الرحيم
الموضوع اللى عايزين نتكلم فية يا جماعة
موضوع جد قوى قوى قوى
و ياريت كلنا نشارك فية برأينا
موضوع حملة
احترم نفسك...لسة فيكى رجالة يا مصر
الحملة دى عملتها مجلة كلمتنا ضد الظاهرة الغريبة اللى بقينا نلاقيها فى مجتمعنا
اللى المفروض اسمة مجتمع محافظ
مجتمعنا اللى كنا بنشوف فية زمااااان امهاتنا بيمشو فية وسط الشارع
و هما مش خايفين على نفسهم
عشان لو حد حاول يعملهم حاجة الف واحد هيحميهم
اما دلوقتى.....لا تعليق
كل واحد مش همة غير نفسة و مش مهم اية اللى بيحصل حوالية
انا هنقلكم افكار حملة احترم نفسك لسة فيكى رجالة يا مصر
من على الجروب بتاعهم فى الفايس بووك
و ياريت احنا هنا نقول راينا و نتكلم بصدق و نواجة نفسنا قبل مانواجة بعض
حملة مجلة كلمتنا ضد التحرش !
حملة بدأها شباب مجلة كلمتنا شهر مايو وهنستمر فيها لحد مانعمل فرق !
قول "احترم نفسك"
لكل واحد بيتعدي على حرية الاخرين ..
لكل واحد شايف نفسه على البنات ..
لكل واحد بيضايق بنت في الشارع... بكلمة..بنظرة ..بلمسة...مش فارقة..
المهم ان خلاص بقى مش هنسكت ..!
عشان لسه فيكي رجالة يامصر !
عملنا استفتاء بين 100 شاب و شابه وجدنا نتائج مخيفة
1-94% من البنات تعرضن للتحرش و نشك ان الباقى فاهم اصلا يعنى اية تحرش؟
2- 50 % رد فعلهم سلبي
3- 64 % بتخاف تحكي لأهلها !!
سألنا الشباب رد فعلهم لو شافوا ولد بيتحرش ببنت
14% منهم قال الميش دعوة
34% قال هتدخل بس بشرط تكون محترمة
20% قال لو شكلها مش محترم هعاكس معاهم
ده غير حكايات البنات اللي بتوصل على إيميل المجلة كل يوم ..حكايات تخلي الحجر يتحرك ...!!
مستني إيه محتاجينك معانا في الحمله يمكن أكتر من البنات...
محتاجينك عشان نحمي اختك والدتك ،زوجتك انها تتعرض لأي أذى من أي حد !
محتاجينك تبقي أقوى تعرفي حقوقك ...متخليش حد ينتهك حريتك ...عايزينك تبقي أجرأ..متخافيش..
احنا عايزين إيه من الحملة؟
- عايزينك تعرف إيه هو التحرش ؟
- عايزينك تتعلمي إزاي تتصرفي لو حد ضايقك في الشارع
- نفكر كلنا في طرق مبتكرة تحمي بيها البنت نفسها
- عايزين الولاد يعرفوا قد إيه الحكاية دي مؤذية لكل بنت
- نرجع تاني نخوة ولاد البلد لما كان واحد يشوف بنت بتتعاكس
- عايزين الأهالي تعلم بناتها إزاي تتصرف ويكون ليها رد فعل لو اتعرضت لأي حاجة في الشارع
- عايزين الأهالي تفهم ان البنت ضحية مش عشان اتعاكست يبقي لازم تكون هي السبب
- عايزين قانون واضح ضد التحرش عشان من حقنا كلنا نعيش بحرية.........!
- ويمكن نتستغني عن ده كله لولقينا من تاني نخوة ولاد البلد...الشهامة ...الجدعنة...الدم الحامي ...باختصار معنى الرجولة !
لسة فيكى رجالة يا مصر
دى يا جماعة افكار الحملة و انا عرضتها عليكم
ياريت بقى دلوقتى نتكلم كلنا
نسمع رأى بعض
نحاول نعمل حاجة
يمكن...يمكن نقدر
مستنياكم
عندنا كلام كتير لازم نقول
الجمعة أغسطس 29, 2008 9:25 pm
