ازيكوا ياجماعة أخباركوا ايه .. يارب تكونوا بخير وصحة كويسة قولوا آمين ...
إحنا هنتكلم فى موضوع شائك شوية النهاردة بس ياريت كلامى يبقي خفيف على قلبكوا والناس تهدى شوية وتقرأ للآخر .. وأنا هتكلم بإختصار عشان الناس ماتزهقش من الموضوع ... !!!
انا ملاحظ إن فكر الشباب المصري بقي مسمم جداً , انا ماعرفش ازاى الناس بقت بتفكر بالشكل ده .. بنسمع عن إتجاهات سياسية والتعددات الحزبية .. والشاب المصري يقول لإبن بلده اسكت دا انت علمانى ولا انت شيوعى ولا .. ولا .. ولا ؟؟؟!!!
فى ايه بقي ياجماعة ..
انتوا جبتوا الكلام ده منين ..
انتوا نسيتوا أساسا إننا مصريين مسلمين ( أو مسيحيين )
وأنا هوجه كلامى للشاب المصري المسلم .
انت تعرف يعنى إيه شيوعية ولا ليبرالية ولا علمانية ولا الكلام ده ولا كل واحد بيسمعله حبة كلام كويس على أى منتدى يقول بس هما دول حبايبي أنا من زمان نفسي أكون كده , خدونى معاكوا ( ويعمل زى اللى نزل مع اخوه القبر عشان بيحبه وأتارى أخوه كان عملوا اسود ومنيل وهيخش النار ) .!!!
أنا بحس إن فى شباب كتير هنا فى المنتدى أفكاره غريبة جداً زى ما يكون متحفظ كلام يقوله !!!!
طب ياعم منك ليه تعالوا نلقي نظرة على الحركات السياسية فى مصر وهما بيتشكلوا معظمهم فى 3 اتجاهات اللى هما :
1- الشيوعية .
2- الليبرالية .
3- العلمانية .
نشوف يعنى ايه كل حركة من دول وبتدعى لإيه وإيه الحركة المناسبة للشاب المصري من التلات حركات دول :
الشيوعية
الشيوعية هى : مذهب فكري يقوم على الإلحاد وأن المادة هي أساس كل شيء ويفسر التاريخ بصراع الطبقات وبالعامل الاقتصادي. ظهرت في ألمانيا على يد ماركس وإنجلز، وتجسدت في الثورة البلشفية التي ظهرت في روسيا سنة 1917م بتخطيط من اليهود، وتوسعت على حساب غيرها بالحديد والنار. وقد تضرر المسلمون منها كثيراً، وهناك شعوب محيت من التاريخ بسببها
يعنى الشيوعية اللى مأسسها واحد يهودى والحركة دى أساسا قائمة عل الإلحاد .. حد مصري مسلم عنده إستعداد يبقي ملحد كافر ؟؟؟ ياريت تفهموا بقي الناس دى جايلنا منين ...
الليبرالية
إن مفهوم الليبرالية، كما وضع له في الغرب، يصطدم بالدين الإسلامي، بل كافة الشرائع، في أصول لايستهان بها، كاستبدال الحكم الإلهي بالحكم البشري، فيما يسمى بالديمقراطية، وكذا الحرية المطلقة في الاعتقادات، بالتغيير والتبديل، وغير ذلك.
ومن العجيب أن نرى دعاة لهذه الفكرة بيننا، يفتخرون بها، ويتسمون بها، ويجاهرون بتقدمها، وصلاحها لعلاج كافة السلبيات المتراكبة المتراكمة في النواحي: الفكرية، والاجتماعية، والاقتصادية، والسياسية.. وينادون أن الحل في "الليبرالية، دون متابعة لما يجري في الغرب، مصدر الليبرالية، من معارضة وانتقاد لهذا النهج، بعد ظهور سلبياته المدمرة، المغلفة بالشعارات الجميلة والمكاسب الظاهرة.
اللى بيقولوا على نفسهم ليبرالين فاهمين يعنى ايه ليبرالى ؟؟
برده الحركة دى بتدعوا إلى إن الإنسان هو إله نفسه , ومفاهيم تانية كتير ماينفعش يؤمن شاب مصري مسلم بيها .. ياريت الناس تركز وتشوف وكل واحد يحط عينه فى وسط راسه بقي .
العلمانية
مفهوم العلمانية : لفظ العلمانية ( بفتح العين) مشتق من العالم والدنيا، فتكون الدولة العلمانية تبعاً لذلك هي الدولة الدنيوية وليست دولة الدين. ولفظ العلمانية ( بكسر العين) مشتقّ من العلم فتكون الدولة العلمانية هي دولة العلوم وليست دولة الدين.
ويلاحظ أن بين اللفظين متجانسان جناس لفظي ظاهر في تشابه الحروف، وجناس معنوي في أنّ كليهما ينفيان أن تكون الدولة دينية.
إنت ياعم إنت زهقت من القراية ولا إيه لأ أصبر كمل معايا لحد الآخر اوعى تكون نمت ..
إنت يامسلم فوق وشوف الأفكار المسمومة اللى انت ماشي وراها وبتدعى ليها وإنت أساسا ماتعرفش أصلها وفصلها
كل حاجة بتقولك إنت ودولتك آل ويقولك إحنا موجودين عشان نساعدالغلابة وكفاية حرام وماعرفش إيه .. طب وبعدين ؟؟؟
فين حق ربنا علينا !!!!!
ما إحنا قلنا من الأول .. لو إحنا بقينا مسلمين صح عمر ما كان حد قدر علينا ولا ريس إدانا على دماغنا ولا حتى القوى العظمى نفسها هتقف فى وشنا .. لكن إحنا فين من إسلامنا .. إحنا بعيد أوى اوى اوى .. ياريت نرجع لدينا تانى ياناس يامسلمة ونتوب لربنا ونرضيه وهو هيرضينا ومش هيحكم علينا اللى يظلمنا أبداً ..
سيبوكوا بقي من علمانى وشيوعي وليبرالى والمسميات الغبية دى كلها اللى ولا بتودى ولا بتجيب لأن كل الحركات دى أثبتت فشلها فى أماكن كتير ( الإتحاد السوفيتي أكبر مثال ) .. وغير كده إحنا مسلمين يعنى اما حد يسألك يقولك إنت إيه مش هتقوله شيوعى وماعرفش ايه لكن هتقوله انا مصري مسلم
وربنا يكتبلنا الهدى جميعاً
رمضان كريم
السبت أغسطس 30, 2008 2:21 pm
